Tras a charla os voluntarios e o monitor dirixíronse ata o paseo fluvial ordense, onde realizaron a primeira das súas prácticas ao facer un estudio físico- químico do río Cabrón, onde o representante de Adega deu as directrices para próximas actuacións dos voluntarios. 

Desta maneira os voluntarios ordenses daban o pistoletazo de saída á primeira das súas actividades como grupo. Unhas actividades que, tal e como se explicara no seu día na presentación do programa, irán dirixidas a traballar en catro áreas. Unha delas será a defensa dos ríos, outra será a vixiancia e a prevención dos lumes colaborando tamén na recuperación dos bosques afectados a través de novas plantacións, tamén se realizará un programa de seguemento ambiental para dar a coñecer a fauna e a flora ordense, e por último, a través deste programa de Voluntariado Verde 2010, tamén se desenvolverán diferentes actividades na natureza e sendeirismo. 

Aínda que as actividades como grupo de voluntarios deron comenzo hoxe, o programa de Voluntariado Verde 2010 do Concello de Ordes xa realizou outro tipo de iniciativas complementarias ás realizadas na edición do ano pasado, dando continuidade a un plan de seguemento ambiental de aniñamento de aves insectívoras nas caixas niño que foran colocadas coa colaboración da empresa Internaco durante 2009. 

Para a coordinación do Voluntariado Verde 2010, o Concello de Ordes conta co traballo dunha becaria durante seis meses, beca que corre a cargo da Obra Social de Caixanova. No programa participan, nesta edición de 2010,  un total de 17 mozos e mozas ordenses.