O obxectivo deste curso é o estudo do xogo tradicional desde a perspectiva teórica: nocións básicas, o xogo como manifestación cultural, o xogo como necesidade vital do ser humano, o xogo popular / tradicional. Ademáis coñeceránse as características específicas dos xogos tradicionais galegos eo estado da cuestión en canto ao seu estudo. Porase en común o papel do xogo tradicional na educación e as estratexias de introdución do patrimonio lúdico galego no ámbito escolar. Tamén se analizarán as estratexias de recuperación do patrimonio lúdico galego que se están desenvolvendo desde diferentes ámbitos, e debater sobre outros posibles. Durante os dous días practicaránse unha importante batería de xogos de diferente tipoloxía e poñer en común variantes dos xogos propostos, e mesmo xogos novos.

No primeiro día do curso, o venres 2 de outubro afondarase na parte teórica. Proxectaranse videos sobre o xogo tradicional e haberá diversas charlas de relatores / as de Persoal da AGXPT. A xornada rematará cun coloquio e cunha cea colectiva.

A aprendizaxe e práctica de xogos centrarán os actos da segunda xornada, o sábado, 3 de outubro. Realizaranse xogos de animación e de patio escolar como arrastrar a tartaruga, tiro á lata, os zancos, os sacos, o peón ou as chapas entroutros moitos. Tamén haberá tempo para os xogos musicais, xogos para adultos como a porca, a petanca, a chave ou as carrilanas.

Estas xornadas destínanse ao profesorado de ensino primario e secundario en xeral e educadores do tempo libre. O número máximo de participantes é de 60, por rigorosa orde de inscrición. Ata o 27 de setembro poden formalizarse as matrículas cun custe máis baixo. 15 euros para os socios da Nova Escola Galega, o mesmo prezo para estudantes e parados. A cota ordinaria é de 25 euros. A partir do 28 de setembro increméntanse os prezos. O boletín de inscrición pode baixarse da páxina web da AGXPT (www.agxpt.org) ou de NEG (www.nova-escola-galega.org).