A expedición ordense do IES Maruxa Mallo entregou ao alcalde, Manuel Regos, un agasallo do seu homónimo polaco, en resposta ao que  xa enviara o Concello de Ordes a través destes alumnos ordenses para o Concello de Pszczyna. 

Durante a recepción desta mañá no Concello, na que tamén participaron a concelleira de Educación, Mocidade e Discapacidade, Silvia Marín, e o concelleiro de Cultura e Deportes, Ramón Vázquez Raña, os responsables municipais interesáronse pola estancia dos escolares ordenses en Polonia, así como as costumes e características do pobo que visitaron, volvendo a mostrar o alcalde, Manuel Regos, o seu interese por chegar a irmanarse con dito pobo polaco, tal e como xa anunciara na visita dos escolares de Pszczyna ao municipio ordense. 

A través deste intercambio escolar, enmarcado dentro do proxecto Comenius que financia a Unión Europea, alumnos do IES Maruxa Mallo viaxaran xa o pasado mes de novembro a Lituania, e en febreiro alumnos lituanos e polacos desprazáranse ata Ordes. Uns intercambios entre os tres centros educativos de Ordes, Lituania e Polonia que volverán a realizarse o próximo curso.