Dende as 17 ata as 20 horas terá lugar unha gran festa de entroido con divertidos obradoiros de globoflexia, maquillaxe, disfraces e complementos, ademais de xogos populares cos que se pretenderá animar a todos os nenos e nenas do municipio. Os actos celebraranse na Alameda, aínda que en caso de choiva trasladaranse ao Pavillón Campomaior.

Pero o día grande dos festexos de Entroido en Ordes será o sábado 20 de febreiro coa celebración do “Sábado de Piñata”. A partir das 17 horas dará comenzo o desfile de carrozas e disfraces polas prinicipais rúas do pobo ata rematar no Campo da Feira, onde se celebrará o tradicional concurso, que este ano repartirá máis de 5.000 euros en premios.

En canto ao concurso estableceranse varias categorías, unha para as carrozas, outra para as comparsas dividida en adultos e infantil, e outra categoría individual tamén dividida en adultos e infantil.
Na categoría de carrozas haberá dous premios, un primeiro de 800 euros e un segundo de 600. Na categoría das comparsas, que deberán estar integradas por máis de cinco compoñentes, para os adultos establecéronse tres premios de 600, 500 e 400 euros, e para os nenos outros tres premios de 300, 250 e 200 euros.

Por outra banda na categoría individual, na que cada grupo participante non poderá exceder os cinco compoñentes, os adultos poderán optar a un primeiro premio de 200 euros, un segundo de 150 euros e un terceiro de 100 euros, mentres que os participantes na categoría infantil loitarán por outros tres premios de 150, 100 e 90 euros.

A categoría de adultos estará destinada para os participantes maiores de 16 anos, e a infantil para os menores de 16 anos. Ademais tamén se estableceron dous premios especiais, un á simpatía dotado de 200 euros, e un premio especial do Concello de Ordes á mellor comparsa municipal dotado de 400 euros.

Para os participantes no concurso o tempo máximo de actuación será de 3 minutos e a entrega de dorsais finalizará ás 16:30 horas. Todos aqueles que queiran participar no concurso deberán facer unha inscrición previa do 1 ao 19 de febreiro no departamento de Cultura e Deporte do Concello de Ordes de 9 a 14 horas, ou chamando aos teléfonos 981680002 e 981680157, onde tamén recibirán máis información.

Dende o Concello, o alcalde, Manuel Regos, animou a todos os veciños e veciñas de Ordes a que sexan partícipes desta festividade, que se está a converter ano tras ano en todo un referente en toda a comarca, “animo tanto a veciños e veciñas do municipio como a visitantes de toda a comarca a que participen no noso Entroido, no que sen dúbida non faltará a diversión, os bos disfraces, as máscaras e como non podía ser doutra maneira neste tipo de festa, o bo humor”.