O conselleiro de Cultura e Turismo tomou boa nota das peticións dos representantes dos 11 concellos que segundo el mesmo indicou se “centraron sobre todo no mantemento do Camiño e no estado dos albergues”. Os alcaldes solicitaron maiores axudas económicas que permitan sufragar os gastos de mantemento que supón o camiño e tamén insistiron na necesidade de que se dea solución aos problemas de aloxamento que poidan xurdir ao entender que as prazas dispoñibles nos albergues son moi limitadas.

O conselleiro adiantou a posibilidade de subir o prezo por pernoctación nos albergues públicos ata os 6 euros, “sempre conseguindo mellorar o servizo que se ofrece aos peregrinos”, indicou que é unha posibilidade que se está barallando para axudar a sufragar os gastos de mantemento destes edificios e, sobre todo, coa idea de poder ofrecer un servizo con maior calidade por un prezo que aínda así segue a ser simbólico.

Pola súa parte, o Presidente da Mancomunidade, Xaquín García, quixo agradecer publicamente a visita do Conselleiro a Arzúa xa que “foi unha solicitude acordada por todos os Alcaldes e representantes da Mancomunidade de cara a aclarar algúns asuntos ante a chegada inminente do vindeiro ano Xacobeo”. Ademais das demandas expostas ante o Conselleiro no referente ao mantemento do Camiño e ao estado dos albergues, Xaquín García insistiu na necesidade de que coa maior urxencia a Xunta de Galicia traballe na aprobación da delimitación do Camiño de Santiago para axilizar así de maneira notable tanto os trámites a seguir como o tempo que se tarda en resolver os expedientes que os veciños dos Concellos polos que pasa o Camiño presentan para a execución de obras nas súas vivendas ou propiedades.