Manuel Pérez Rúa, reuníu no traballo galardoado, as testemuñas directas dun grupo xeracional pertencente a unha parroquia do concello de Moaña. A elección non foi casual, senón que responde a características peculiares e significativas. Unha delas ven xustificada no ámbito xeográfico, xa que a cidade de Vigo foi unha urbe xeradora de riqueza, polo que as xentes desta comarca tiveron máis oportunidades de traballar e desenvolver a súa vida sen alonxarse do entorno familiar.
Xunto a estas voces o autor recolleu para o seu estudo percorridos biográficos das xentes protagonistas do cambio, como estudantes do seminario, das escolas náutico pesqueiras e de capacitación agraria e das universidades laborais. O “Retrato da xeración de 1950” amosanos a unha xeración marcada fundamentalmente polo tránsito do campo ás cidades e tamén polo da emigración, anque cun cambio de orientación.
Mentres na primeira metade do século XX a emigración de referencia era a americana, a partires do ano 59 ese fluxo migratorio dirixiuse cara aos países europeos E mentres a emigración americana retorna as mesmas aldeas e ao mesmo clima, a emigración europea que inicia a xeración de 1950 é paralela ao desenvolvemento económico máis alto de Galicia, co boom dos asteleiros, e da pesca de altura. Remata pois o proceso de agrarización e comenza a industrialización co abandono progresivo das aldeas.
A xeración de 1950 beneficiada polo gran cambio económico tivo por tanto máis oportunidades de permanecer na súa terra que os seus antecesores, e comenzar unha vida de “modernidade”, con esa migración á cidade e o abandono das casas familiares por vivendas nas urbes.
A evolución social traerá tamén cambios trascendentais noutros eidos como o da relixión, cunha perda dos ritos católicos, tan arraigados na xeración anterior, marcados pola chegada dos curas obreiros ou os cambios na igrexa que permitiron a entrada das lingüas vernáculas na misa, entre outros. Outro dos cambios trascendentais refírese ao abandono da lingua, feito éste que rexistra as maiores perdas nesta xeración de 1950.
