Cun seminario de perrucaría comercial, dirixido especialmente a profesionais do sector, arrinca o vindeiro sábado en Narón o sexto Campionato Galego de perrucaría canina. O certame incluirá, como nas edicións anteriores os habituais apartados de perrucaría comercial, de corte a tesoira e de stripping (unha das modalidades de corte máis complexas e que se adoita empregar para determinadas razas como schnauzers ou terriers). Ademais incluirá, como novidade, unha serie de stands onde se farán demostracións e se poderán adquirir algúns dos máis novidosos productos que se están a empregar en perrucaría canina, dende cepillos a bañeiras de hidromasaxe. O evento concluirá cunha exhibición de moda para cans, un desfile que, segundo Juan Chedas, vai chamar moito a atención por canto se vai presentar en Narón logo de ter acadado un grande éxito nunha pasarela de Nova Iork.  

O VI Campionato Galego de Perrucaría Canina desenvolverase durante a fin de semana, sábado e domingo, no Centro Comercial Dolce Vita Odeón, en horario de mañá e tarde.