Trátase de dúas especies protexidas, a andoriña de cu branco (Delichon urbica) e cirrios (Apus apus), ambas especies insectívoras que gozan de protección e están consideradas en regresión e de interese especial polo Catálogo Español de Especies Ameazadas. Logo de comprobar que a rede instalada no viaduto impedía as andoriñas acceder aos seus niños e proporcionarlles comida ás súas crías, realizáronse xestións ante Patrimonio do estado e o venres abríronse finalmente uns buracos na rede. Nembargantes moitos dos niños estaban xa perdidos porque os pitos levaban días sen comer o que provocou que morreran máis da metade.

ADEGA manifesta as súas dúbidas sobre o futuro da colonia, xa que despois de moitos anos aniñando no mesmo sitio, as condicións mudaron radicalmente, e aínda que consigan lograr as niñadas este ano, é posible que nos vindeiros anos as andoriñas deixen Redondela dadas as dificultades. O colectivo ecoloxista denuncia a pouca sensibilidade e compromiso coa conservación do patrimonio por parte da administración, xa que actuacións semellantes con consecuencias nefastas non é primeira vez que acontecen e reclaman que se rematen de abrir os accesos na rede aos niños que aínda faltan, cando menos para que as andoriñas poidan efectuar a última posta deste ano.