Cabichas, envases de alimentos ou elementos relacionados coa pesca son algúns dos milleiros de residuos que acaban no mar e que ameazan de xeito moi intenso aos ecosistemas terrestres e mariños, ademais da saúde humana. A meirande parte dese lixo está a provocar problemáticas ambientais moi graves que resulta necesario mitigar e reverter. “As nosas aves xa están dixerindo e introducindo plásticos no seu organismo que, por sorte, algún deles conseguiron expulsar polas mostras que nós atopamos en boliñas que deberían ter patas de cangrexo e tiñan plásticos. Tamén hai moito lixo que chega polo váter. Aínda a día de hoxe seguimos tirando polo inodoro cousas que non debemos e que rematan no mar. Nós dicimos que polo váter só se tiran tres cousas que empezan por p: papel, pipí e ‘popó’. Todo o que non sexa iso non debería tirarse polo váter”, explica Laura Calvo, educadora do Programa de Educación, Capacitación, Divulgación e Participación Ambiental para unha transición ecolóxica desenvolvido polo CEIDA. Estamos ante un momento de crise ambiental sen precedentes, na que a emerxencia climática, cada vez máis visible a través de eventos meteorolóxicos extremos, o acelerado ritmo de perda da biodiversidade a nivel mundial e a contaminación mariña son fenómenos que non podemos obviar. “Xa ninguén pode dicir que non existe. Vese por todas partes”, conclúe Laura Calvo dende o Centro de Extensión Universitaria e Divulgación Ambiental de Galicia.

Na imaxe, Laura Calvo (Educadora Medioambiental do CEIDA) e Susana Falcón (Radiofusión)