A empresa galega, que emprega directamente máis de 10.000 persoas a nivel mundial e máis de 1.500 deles en Galicia, subliña que conta "con importantes fundamentos para soster a súa actividade empresarial e xeración de valor", na medida na que o negocio se sustenta sobre todos os piares precisos dende a extracción, o cultivo, a elaboración e distribución.  Pescanova SA e as súas filiais integran o primeiro grupo pesqueiro a nivel europeo e atópanse entre os dez maiores grupos do sector a nivel mundial. En relación aos seus principais activos, destaca a súa flota de máis de 90 barcos, o valor das súas licenzas de pesca, e máis de 50 instalacións de acuicultura, entre outras. A empresa galega presenta unha débeda de 3.100 millóns de euros, o duplo do que se estimaba inicialmente.

O presidente de Pescanova, Manuel Fernández de Sousa, vendeu, con "importantes perdas", ao longo dos meses de decembro, xaneiro e febreiro case a metade da súa participación no grupo "para achegar liquidez" á compañía, segundo informou a empresa de conxelados nun comunicado. En concreto, despachou títulos representativos dun 6,9% do capital, co que a participación de Fernández de Sousa se sitúa no 7,45% de Pescanova e segue sendo o maior accionista. Con todo, vai ser investigado por se se beneficiou de información privilexiada para obter uns 30 millóns de euros sabedor de que ía presentarse o preconcurso de acredores.
Tamén transcendeu que Pescanova elixiu finalmente a consultora KPMG para auditar as contas da empresa galega tras a revogación de BDO Auditores. Ademais, confirmou que demandará a BDO, firma que revisou as súas contas dende 2001, ao considerar que non realizou correctamente o seu traballo. A compañía galega contratou ao despacho de avogados Albiñana & Suárez de Lezo para que se encargue de elaborar a demanda contra a auditora.