Con este taller  preténdese dar a coñecer unha serie de pautas para o consumo responsable, ofrecendo os instrumentos necesarios que permitan identificar tódolos tipos de publicidade e así axudar á economía doméstica. 

Outro dos obxectivos pasa por promover á contribución das prácticas medioambientais e fomentar a solidariedade, dende un punto de vista moi práctico, participativo e dinámico. 

Dende o goberno municipal, o edil José Alén tildou a iniciativa de novidosa xa que é a primeira vez que As Pontes conta cun obradoiro similar. Asemade, o concelleiro deu a coñecer algúns dos contidos deste taller coma o apartado adicado ás rebaixas, nas que se ofrecerán consellos moi útiles para esta época e para gastar pero de forma responsable. 

Por outra banda, tamén se abordarán outro tipo de vendas coma o comercio solidario, a elaboración da lista da compra diaria e da publicidade dos diferentes produtos alimenticios ou a xestión de refugallos, facendo fincapé na importancia da reciclaxe e da separación do lixo.  

As persoas interesadas en tomar parte neste taller tan só terán que achegarse ata o departamento municipal de Servizos Sociais, sito no segundo andar da Casa Dopeso, ou ben telefonar ao 981 44 00 18.