A XIIª edición dos Encontros para a Normalización Lingüística, que ten lugar estes días en de Santiago de Compostela, acolleu esta mañá a presentación da orde de creación desta Rede, acto ao que acudiron a subdirectora xeral de Planificación e Dinamización Lingüística, Cristina Rubal, e o membro coordinador do grupo de traballo da Rede, Valentín García.

Este novo organismo buscará crear unha planificación lingüística que defina estratexias básicas comúns en todo o territorio autonómico, proporcionando ás entidades o acceso a todos os recursos e materiais dispoñibles neste ámbito. Tamén buscará proporcionar un marco de formación para os profesionais dos servizos lingüísticos e outros axentes participantes. A adhesión á Rede é totalmente gratuíta e voluntaria, estando destinada a toda entidade con competencia na promoción do uso do galego, incluíndo as de titularidade privada sen ánimo de lucro.