O paso atrás na conta horaria non é por capricho, senón que atende a unha norma de obrigado cumprimento para todos os países da Unión Europea en vigor dende o ano 1981 e que tan só se revisa cada catro anos. Fora a crise do petróleo do ano 1974 a que obrigara a algúns países a idear medidas de aforro, coincidindo no interese de aproveitar mellor a luz do sol en troques de ter tanto tempo prendida a iluminación eléctrica. Así xurdiu a idea de adiantar os reloxos nos meses de verán, unha mudanza transitoria que se desfai cando se aproxima o inverno e que cómpre realizar nesta madrugada do sábado ao domingo.