Ao redor de sesenta e cinco persoas se apuntaron á degustación de fungos e cogomelos que organiza Aetna para a vindeira fin de semana. Segundo o presidente da entidade, Juan José Cabana, “superáronse todas as expectativas” ate o punto de que se tivo que pechar anticipadamente o prazo de inscripción.

Nunha entrevista en Radiofusión, Juan José Cabana explicou que o que pretende Aetna é “institucionalizar esta festa ao redor dun dos froitos típicos do outono”. Ademais, con este encontro gastronómico ponse punto e final a unha nova campaña de estudo e recolleita de fungos e cogomelos na sociedade. Neste senso, ao longo das últimas semanas, os membros da Asociación de “Amigos do Río Vaa” participaron en varios encontros para intercambiar impresións e coñecementos sobre micoloxía, ademais de organizar varias saídas ao monte.