A conselleira volveu a vista atrás para salientar a importante transformación que sufriu a frota no que respecta aos motores de hoxe en día “motores diésel cargados de electrónica nun avance sen parangón na técnica naval”, ou “aos aparellos electrónicos que aproveitan sinais de satélites para dar a posición exacta ao milímetro e localizan o peixe en forma dixital” e aos modernos sistemas de proteción “que permiten socorrer persoas no mar en situacións antes irreversibles”.
Quintana manifestou o apoio da Xunta de Galicia a esta feira bienal “que marca novos rumbos para a técnica e para a vida e a actividade humana no mar” e unha vez máis, apelou á unión de sector, entidades e empresas de desenvolvemento como “a mellor ferramenta” para para o progreso, a innovación e o futuro do sector. A responsable autonómica de asuntos pesqueiros reiterou a súa aposta polo I+D+i para asegurar o futuro deste sector “que segue a medrar incluso nun contexto de crise económica”.
Por último a conselleira amosou as súas condolencias polo traballador falecido no porto de Burela onte pola tarde nun accidente laboral e enviou unha mensaxe de ánimo á súa familia e a todo o sector auxiliar do eido náutico- pesqueiro da comarca “que sempre estivo a carón e traballando cóbado con cóbado cos nosos mariñeiros, para axudar e dar forma a todas cantas melloras ten cometido o sector nas últimas décadas”.