Os traballadores de Navantia movilizaronse esta mañá en Ferrol. Dende as 10,30h  concentrándose diante do edificio administrativo da Xunta, en protesta por non telos recibido o presidente, Núñez Feijó. Os representantes do comité fixaran o prazo dunha semana como máximo para fixar o encontro co presidente, pero o máximo responsable do Executivo galego mantén silencio sobre a solicitude que lle envióu o alcalde ferrolán despois da xuntanza que a semana pasada mantiveron alcaldes e os representantes dos traballadores. Os comités de empresa solicitaron en varias ocasións ao presidente da Xunta unha entrevista para analizar a situación de falta de traballo, pero nunca os recibiu.

Os traballadores demandan do Goberno autonómico información sobre o dique flotante que se comprometeu a apoiar para a división de Reparacións e tamén sobre o encargo para a fabricación do flotel de Pemex. Pero van ter que agardar ao día 30 de decembro para coñecer o resultado da adxudicación do barco. Tamén o comité de empresa criticou as últimas declaracións do ministro de Facenda, Cristóbal Montoro, en relación a unha futura carga de traballo en Navantia mediante a construción dun gasero para Gas Natural. "Montoro pode estar tranquilo porque seguro que ten unha empresa privada que o meta no seu consello de administración cando acabe a súa actividade política, pero os traballadores non teñen esa tranquilidade", concluíu.

Probablemente a desta mañá sexa a última manifestación na rúa dos operarios de Navantia por este ano 2013, pendentes de noticias sobre o flotel de Pemex o dia 30 de decembro.