Varela defendeu a escolla do autor de "Poesía última de amor e enfermidade" como protagonista do 17 de maio, declarando que se trata dun poeta que foi quen de "extraer arte da permanente ameaza da morte, ou, o que é o mesmo, foi quen de facer agromar a beleza combatendo a dor". O conselleiro atribuíulle a Pereiro a condición de "clásico moderno" e emparentouno cos mellores autores da poesía europea recente.
 

Da oportunidade para popularizar a obra de Lois Pereiro durante este mes das Letras dá conta unha iniciativa a un tempo cultural e comercial. Así como a faciana do Ché viaxa en camisetas, a do autor galego e os versos do seu poema "Transmigración" poderanse ver nas bolsas da compra dos Supermercados Gadis. Os máis de 700.000 clientes destas tendas poderán levar estampadas, alí onde transportan os alimentos, as palabras que lía na presentación desta campaña a poetisa Iolanda Castaño.