Hoxe, día en que se conmemora o Día Internacional dos Dereitos Humanos, moitas son as organizacións humanitarias que seguen a traballar e a pelexar polo cumprimento dos pactos internacionais que garanten os dereitos esencias das persoas.

Dende Amnistía Internacional hoxe mesmo levarán a cabo unha recollida de sinaturas na cidade da Coruña para esixir que éstes países ratifiquen os tratados internacionais que impidan a violación sistemática dos dereitos humanos que todavía se practica. O voceiro desta asociación, Alberto Estévez, falaba esta mañá en Radiofusión, da importancia crucial que ten a presión internacional, e tamén a estatal e local, neste senso. Referíuse Alberto Estévez aos dous países, grandes potencias mundiais, nos que máis se están a violar os dereitos das persoas: Estados Unidos e China.

No país americano, onde un 12% da poboación é de raza negra, as violacións dos dereitos culturais, sociais e económicos seguen a ser unha constante. Así por exemplo segue a haber grandes discriminacións nas escolas públicas e o maior número de abortos corresponde a mulleres desta raza. Polo que respecta a China, segue a ser, en palabras de Alberto Estévez, “o maior verdugo do mundo”, con cáseque 20 execucións diarias froito das irregularidades do goberno. As torturas, detencións xudiciais erróneas e a pena de morte, seguen a ser no país oriental algo cotidiano.

Neste senso, dende Amnistía Internacional, salientan a importancia da presión política internacional para pór a estes estados que violan os dereitos humanos na liña dos que cumpren os tratados internacionais e que ratifiquen estes acordos que inda non recoñeceron.