Hernández e Reyes interpretarán algúns exemplos de Scherzi xunto con motetes sacros, da colección do compositor italiano coñecida como Selve morale e spirituale. Pero tamén haberá espazo para fragmentos destacados das súas óperas Orfeo e L¹incoronazione de Poppea.

Os composteláns Mercedes Hernández e Fernando Reyes forman parella artística desde a fundación de Resonet, alá polo ano 1989. Ambos son dous dos músicos galegos que colaboran máis estreitamente co Via Stellae, para o que cada ano, desde a creación do festival, preparan novos proxectos, como o que este ano dedicouse a Monteverdi. A soprano Mercedes Hernández e o tiorbista Fernando Reyes especializáronse en música antiga nos prestixiosos centros de Toulouse (Francia), Trossingen (Alemaña) e Basilea (Suíza). Colaboran habitualmente con distinguidos especialistas (como Jordi Savall, Martin Gester, Gabriel Garrido, etc.), ofrecen numerosos concertos por toda Europa e desenvolven unha intensa actividade de investigación dedicada á recuperación da música vencellada a Galicia, a peregrinación e os Camiños de Santiago como demostran as aplaudidas gravacións discográficas do seu grupo Resonet.