Xosé Ramón Bernárdez, organizador do Queixo Maquetón, salientou en Radiofusión o récord de propostas recibidas nesta edición con 54 maquetas presentadas, 28 pertencentes a bandas galegas e todas as demais procedentes do resto do Estado. Ademais, o seu myspace recibiu máis de 2.500 visitas durante os tres meses que estivo aberta a convocatoria.
Para a elección do gañador, o Queixo Maquetón conta cun xurado de luxo: Roberto Nicieza (Pop Up Música), Chema Rey (Radio 3), Salvador García (Radio Vigo - Maketón Estrella Galicia), Josiño Carballo (Ernie Producciones) e o propio Xosé Ramón Bernárdez.
A final terá lugar o sábado ás seis da tarde e o gañador volverá actuar ás doce e media da madrugada. Deste xeito, pasadomañá, despois da final, ás nove e media da noite, comezarán as actuacións estelares con Tote King. O rapper andaluz presentará en Arzúa o seu novo disco, El Lado Oscuro de Gandhi, e dará paso despois á actuación de Delinqüentes + Tomasito, prevista para ás once da noite. A xornada rematará coa agardada sesión musical de Chema Rey a partir da unha e media da madrugada.
Xa na xornada do domingo, 13 de marzo, a programación musical comeza á unha da tarde coa conferencia e sesión musical de Chema Rey DJ,. O emblemático locutor de Radio 3 achegaranos á Historia do Rock a través de imaxe e son nunha sesión bailable que se prolongará ata ás dúas e media da tarde. Ás seis poderemos gozar coa actuación do quinteto acústico Riobó. Por último, a gaiteira Susana Seivane pechará a programación musical da 36 edición da Festa do Queixo cunha actuación que dará comezo ás sete e media da tarde.
Finalistas do Queixo Maquetón
Desde Euskadi chegan Zapatotipobota, un proxecto que eles mesmos denominan indietronic. Con guitarras rockeiras ao estilo Ira Kaplan ou J. Mascis e voz rasgada, foron finalistas do XXII Villa de Bilbao e xa andan preparando o seu primeiro traballo. A representación galega é dobre e chega desde Vigo, como nas dúas edicións anteriores, co grupo Munich, que funde os sons dos oitenta máis escuros coas atmosferas actuais máis densas e profundas; e desde Chantada Le Cûl, unha banda que forma parte do que se deu en chamar “Galician Bizare”, un movemento musical que cada día está a cobrar maior protagonismo coas súas propostas afastadas dos convencionalismos e que seguramente dará ben que falar nos vindeiros anos.
