Un dos máis significativos terá lugar no cemiterio de San Francisco de Ourense onde repousan os restos do autor. Alí vaise realizar unha ofrenda floral organizada polo concello  de Ourense e o PEN club de Galicia, asociación que leva anos traballando arreo para rescatar a figura de Blanco Amor do esquecemento e darlle o lugar que merecidamente lle corresponde na literatura universal.

O presidente do Pen Club de Galicia, Lois González Tosar, expoñía hoxe nos micrófonos de Radiofusión, as razóns polas que este escritor foi durante longo tempo unha figura “incómoda, controvertida e denostada” no seu tempo. Lembrou neste senso que Blanco Amor é “das poucas figuras literarias que non ten Padroados nin Fundacións, nen sequera a mesma consideración que outros escritores, sendo un autor fundamental.

O interés do Pen Club de Galicia diríxese precisamente a reivindicar a súa persoa e poñela como exemplo de “marxinación por motivos non literarios”, suliñou Lois González. Blanco Amor foi un autor incómodo tanto para os censores como as xentes que concebían a literatura dun xeito lírico. Os temas que o escritor ourensán puxo nos seus escritos non eran amables senón reflexo dunha realidade dura, algo que á sociedade da época incomodoulle sobremaneira.