A vendima no D.O Rías Baixas toca ao seu fin, manténdose as previsións de descenso que se anunciaban no Informe de Estimación de Colleita 2019, elaborado polo Órgano de Certificación e Control e presentado ao Pleno o pasado 29 de xullo. Até o momento recolléronse 32.000.000 quilos de uva na súa maioría de variedades brancas. Precisamente, o pasado fin de semana a maior parte das adegas botaban o peche á vendima 2019. As máis atrasadas serán aquelas empresas pendentes de recoller sobre todo as variedades tintas de Rías Baixas, que representarán en torno ao 0,80% da produción total da colleita.

A presente vendima desenvolveuse con tranquilidade e a un bo ritmo nun viñedo que se atopaba nun bo estado sanitario e vexetativo. O resultado é unha uva sa e con boas gradacións, a falta de verificar os equilibrios dos mostos. O que si se pode presaxiar é que será unha anada de calidade e moi aromática. Segundo explica o director técnico do Consello Regulador, Agustín Lago, "en xullo, segundo desenvolveuse o ciclo vexetativo, xa se estimaba que os acios fosen máis pequenos e menos pesados. De feito, a falta de choivas en agosto e, mesmo, principios de setembro motivou que estes acios pesen menos do previsto inicialmente no noso informe de estimación vendima e que descendesen máis os quilos de uva". Unhas previsións que apuntaban en xullo a un descenso respecto de 2018 en torno ao 6 %, pero que até o momento materializaríanse en case o 16,9% con 32.000.000 quilos de uva.

25 auditores-veedores son os responsables de velar polo bo desenvolvemento desta vendima 2019, así como polo cumprimento do prego de condicións. Nel recóllese que a colleita en Rías Baixas realízase toda a man e en caixas normalizadas con 20 kg. de capacidade. Como curiosidade, este ano as adegas da subzona do Salnés terminaron máis pronto que o resto de subzonas, mesmo daquelas que foron máis madrugadores e teñen por costume finalizar antes. Na actualidade, este Consello Regulador conta con 177 adegas inscritas. A superficie desta Denominación de Orixe abarca 4.053 hectáreas repartidas entre 21.877 parcelas nas que traballan 5.177 viticultores.