Moi ilusionados pola viaxe que están a piques de emprender, os compoñentes da coral de Maniños amósanse satisfeitos polo resultado deste intercambio que podería dar pe, incluso, a un irmanamento entre ambas as dúas formacións. Asegurouno esta mañá en Radiofusión o presidente do Pote, Gerardo Pérez Sas, ademais de anunciar que a Sociedade non descarta iniciar contactos para procurar novos intercambios con outras agrupacións musicais.

Dezaseis horas de viaxe agardan esta fin de semana á Coral do Pote para ver materializado o seu soño de actuar de novo a carón dos Amigos de la Música. Aínda que descoñecen os pormenores da súa curta estadía na localidade cacereña, os feneses agardan desfrutar da súa paisaxe e gastronomía. Ademais aseguran que teñen preparada unha actuación especial para o festival que organizou para o sábado a coral anfitriona.

Trinta e tres persoas compoñen na actualidade a coral do Pote. Un dos seus membros, Manuel Quintía, asegurou a Radiofusión que “a formación vive na actualidade unha época floreciente, con moitas actuacións”.