José Juán Durán afirmou que esta é a primeira pedra da rehabilitación dunha zona que seguirá mellorando pouco a pouco. Primeira pedra, afirmou, que custou 2 millóns de euros. o presidente de Portos de Galicia declarou que a zona gaña moito esteticamente despois da execución das obras.
A actuación nos peiraos de Fene permitiu a dotación de 106 prazas de amarre para embarcacións menores e recreativas pero, afirmou Durán, non se pecha a posibilidade de ampliar o numero.

O alcalde, Gumersindo Galego, declarou que as obras non se dan por definitimente rematadas, abrindo a posibilidade de melloralas e ampliar as dotacións no futuro.

Na visita estiveron presentes representantes dos traballadores do mar. A patrona maior da confraría, Virginia Souto, transmitíulle ao presidente de Portos de Galicia, a satisfacción dos traballadores pola execución das obras que lles facilitarán o traballo no futuro. Portos prevé rematar a actuación nas próximas semanas, probablemente a fin de mes.

As obras consistiron na habilitación de 106 prazas de amarre mediante a instalación de dúas liñas de pantalán, unidas a través dun reparto. As prazas destínanse a embarcacións menores, na súa maioría do sector marisqueiro, e recreativas. Ademais, executouse a dragaxe da zona para ampliar o calado e mellorar a operatividade das instalacións. Finalmente, demoleuse parcialmente a rampla de Maniños, establecendo pasos de auga para mellorar as correntes e instaláronse rampas pequenas para favorecer o marisqueo.