O avogado de Aguilar, Pedro Trepat salientou a corrección da actuación da mesa de idade nese pleno. Incluso propuxo un receso para estudar o escrito presentado antes da sesión, ao que se negou a outra integrante da mesa. A secretaria non advertiu en ningún momento de ilegalidade e propuxo tamén un receso. Manuela Aguilar reafirmouse na corrección da súa actuación naquel pleno. Entendía que non se daban as circunstancias que marcaba a lei para o desenvolvemento da sesión. Deulle a ler o escrito recibido á outra integrante da mesa de idade. Un tema político trasládase aos xulgados. Isto é unha vinganza persoal, afirmou esta mañá o actual alcalde de Fene Juventino Trigo quen concluíu: “A presidenta da mesa de idade tiña moitos motivos para tomar a decisión que tomou”. 
As circunstancias
Naquel 26 de outubro de 2017  a concelleira de maior idade da Corporación Manuela Aguilar (BNG)  indicou que diante do escrito de Participación Democrática, as circunstancias variaron, e na súa opinión, a moción non se podía votar. A edil de menor idade Rocío Bértoa (PP) manifestou a súa desconformidade con esa decisión. Censurou que non se lle dera traslado do escrito con anterioridade ao comezo da sesión. Aguilar fixo valer o seu voto de calidade dentro da mesa e declarou finalizada a sesión, sen proceder á votación.