Vicente Irisarri destacou que se trataba dun acto para reforzar os lazos de unión entre Ferrol e Mondoñedo e deste xeito dúas das súas figuras máis ilustres, Gonzalo Torrente Ballester e Álvaro Cunqueiro. Ademais avogou pola reivindicación conxunta das dúas cidades como o eixo capital do norte de Galicia. Reedítase así con máis forza que nunca este irmanamento na noite máis máxica e tradicional do ano para os ferroláns, a noite das Pepitas.  

Pola súa banda Modesto Díaz definiu a Ferrol como “o mar dos mindonienses” e sumouse á reivindicación da urbe naval para adicarlle o Día das Letras Galegas a Carballo Calero. Ademais deu os parabéns a todos os homenaxeados e as madriñas das rondallas e gabouse de atoparse na cidade departamental nun día tan arraigado para Ferrol.

Ambos representantes das dúas cidades intercambiaron senllos agasallos e procedeuse á condecoración aos rondallistas e letristas homenaxeados, ás rondallas participantes e as súas madriñas. Posteriormente fíxose entrega dos ramos a éstas últimas rematando o acto coa música de rondalla. Un sinal de identidade da nosa terra, indicou Irisarri.