Na sua resposta ao deputado nacionalista, o Presidente do Goberno español non deu garantías de que vaia cumprir o seu compromiso co BNG en varias ocasións. Zapatero escudouse no feito de que “a situación actual do sector naval, e en concreto a do estaleiro galego, non é a mellor das posíbeis” e refuxiouse nun  “seguimos a traballar e esperamos ter resultados”.

Jorquera lembrou ao Presidente que a semana pasada emprazou ao BNG a manter un diálogo bilateral sobre esas cuestións, “pois ben, poña día e hora porque nós sempre estamos dispostos ao diálogo”. Mais, puntualizou, “vosté tamén ten que respostar ante esta Cámara porque é aquí onde se comprometeu co BNG”. Engadíu ¿Como é posíbel que o Ministro de Industria diga que non se iniciaron xestións para a reapertura do expediente de Fene, porque podería obrigar a devolver as axudas públicas concedidas no seu momento ao grupo Izar? Descoñece o Ministro os compromisos asumidos por vosté?”, inqueriu Jorquera.

Zapatero apelou “á prudencia do Ministro de Industria que ten que ser así nun tema difícil”. Como avaliación a posteriori, Jorquera enfatizou que “moita prudencia si pero o Ministro aínda non formalizou a solicitude de petición de reapertura do expediente”.Neste sentido, salientou o feito de que a UE autorizase recentemente a concesión de axudas públicas a distintos estaleiros polacos “sen lles impór, como a Fene, a prohibición de construir buques”.
 
De igual xeito, afirmou Francisco Jorquera, “a UE autorizou tamén axudas públicas á banca ou ao sector do automóvil”. E demandou ao Presidente do Goberno que “nos escasos dous meses que quedan para rematar a Presidencia española da UE, diga se vai cumprir os seus compromisos con Galiza”.